مكتبة مقالات الفاتح جبره- ساخر سبيل [الأرشيف] - منتديات شاطئ النيل السودانية

مشاهدة النسخة كاملة : مكتبة مقالات الفاتح جبره- ساخر سبيل

الغيداق

12-06-2010, 03:54 PM

[Link nur für registrierte Benutzer sichtbar] 300_a.jpg

نفسك فى قروش كتيرة؟ ياخى القروش دى فتنة أخير ليكا الفقر الإنتا فيهو ده .. لو هسه عملتا ليكا شوية قريشات وبقيت غنى ح ترتكب آثام وح تدخل النار
نفسك تكون مسئول؟ لازم تراجع الطبيب النفسى .. ده هسه كلام يقولوا زول عاقل !
نفسك فى لحمة؟ : اللحمه يا أستاذ ثبت علمياً إنها مضرة بالصحة وبتجيب أمراض كتيره خاصة اللحمة (الكيرى) الأنتا بتاكل منها دى لأنها ما معروفه لحمت شنو؟ والناس بقت ما عندها ذمة ممكن تضبح (أى حاجة) عشان كده خليك فى السليم وأبعد عن الحاجة دى ! وبعدين ياخى الفول ده مالو؟ عيبو ليا ؟ ما برضو فيهو (بروطين) !
نفسك تتفسح إنتا وخطيبتك ؟ ما عندك أى مشكلة طوااالى وعلى حدائق (حبيبى مفلس) ما ح تكلفك الشغلانه خمسة جنيه .. كيسين تسالى .. كيسين فول حاجات .. كبايتين شاى .. إتنين حاجة باردة .. بس لو لموا فيك ناس النظام العام إحتمال المسألة تكلفك أكتر شوية !
نفسك تتوظف؟ : بسيطة .. تمشى طواالى تقابل المسئول القال ح يوفر للخريجين (مليون فرصة وظيفية) وتقول ليهو بالله خلينى أكون (واحد فى المليون) !
نفسك تتزوج؟ : ما تتزوج ليه؟ مش ما عندك التكتح ؟ تتزوج ونص وخمسة وأهو أخوانا العلماء بارك الله فيهم وأثابهم ثواباً كثيراً سهلوا ليكا المسألة وعندك زواج المصواب وزواج المسيار وزواج المصياف ، وزواج المسفار، وزواج المطيار ، وزواج المصياع وزواج المحجاج ، وزواج المسياق .. المهم ما مطلوب منك فى كل الأنكحة المشروعة دى غير (مجهودك الفردى) !
نفسك يكون عندك قطعة سكنية؟ ياخى والله إنتا متفائل جداً .. هو لمن السودان (كان) مليون ميل مربع ما لقيت ليكا قطعة فى الخطة السكنية عاوز تلاقى ليكا قطعه بعد ما بقى مليون متر مربع ؟
نفسك فى ملابس أنيقة؟ يا خى عشان تلبس ليكا لبسة أنيقة عاوز ليك مرتب شهرين بى حالهم .. ياخى ألبس من (المرحوم كان قدرك) هدوم سكند هاند لكن قيافة وآخر وجاهه وتناسب دخلك المهدود
نفسك فى تلفزيون ملون؟ والله الظاهر إنتا ح تجيبوا لى نفسك براك .. ح تجيك المذيعة أم كشاكيش كتيرة ديك وتقعد كل دقيقة تأشر ليك بى أيدا عشان تشوف نقشة الحنة ويجيك بعدها المذيع القاعد يسبل فى عيونو وكل دقيقتين يقعد يقهى ليكا فى سقف الأستديو .. والمصيبة تقوم تشاهد ليك مباراة (غمة) !
نفسك تتعالج ؟ يا أستاذ الشافى الله .. خليك من مسألة الأطباء والمستوصفات دى عشان ممكن يعالجوا ليكا حاجة ويبوظوا ليكا عشرين حاجه ! المهم لو ما سمعتا كلامى وربنا سهل ليكا ومشيت ودخلتا عملية فنصيحة أخوية أعمل جرد لأعضاءك قبل العملية وأكتبهم (للورثة) عشان يراجعوا (العدد) وهم بيغسلوا فيك !
نفسك تلبس كويس؟ : طوااالى ييم وجهك شطر (خلف الجامع الكبير) حيث سوق الحرامية وألبس من (المرحوم كان قدرك) .هدوم مستعمله وآخر وجاهة..و رخيصه.. وقدر ميزانيتك (ده لو عند ميزانية) من أساسو

نفسك أولادك يتعلموا؟ ح تجيب ليهم كل يوم قروش طباشير وقروش كهرباء للمدرسة وموية للمدرسة وقروش فطور للأساتذة وقروش طباعة إمتحانات وقروش مش عارف ايه من وين؟ وبعدين أفرض قعدت تصرف كده لحدت ما إتخرجوا ح يشتغلوا وين؟ أسمع كلامى خليك من مسألة التعليم دى خلى الأولاد يكبروا شوية وبعدين يترشحوا للبرلمان !
نفسك تسافر ؟ ممكن بس لازم تدخل ليكا صندوق وتشيل الصرفة الأولى .. إنتا عارف إستخراج الجنسية والبطاقة والجواز بى كم؟ خليك من تذاكر الطيارة (الفيها تصل وفيها تتحرق) فى المدرج قبل ما تقوم !

نفسك تغترب ؟ شيل الفكرة دى من راسك بأسرع ما يمكن .. هو مرتبك هناك ده (لو إشتغلتا) ح يكفى ال ح ترسلو للأسرة وللا الح تدفع منو للقسط بتاع الفيزاء وللا طلبات الأقارب والأهل والجيران وللا تجديد الوثائق والضرائب والمساهمة (الإلزامية) والزكاة وترعة
كنانة والرهد وقناة الخرطوم ودمغة الشهيد و الجريح والغريق ...وجاياكا كمان (دمغة الإنفصال) ؟
كسرة :

نفسك تموت وترتاح من الدنيا دى؟ إستمع لتصريحات بعض المسئولين من نوعية (أوروبا تستهدف السودان !) .. يعنى مش بلد بلدين .. لا .. (أوروربا كووووولها) تستدف السودان .. يعنى (قارة كاملة بى حالها) ... أااخ يا مرارتي !!!

الفاتح جبره- ساخر سبيل

ابو ملاذ

12-06-2010, 09:02 PM

الغيداق

12-08-2010, 02:31 PM

[Link nur für registrierte Benutzer sichtbar] 554_a.jpg

بعد تخرجه من الجامعة عمل (عوض) فى وظيفة (محاسب) بإحدى المؤسسات الحكومية ، تدرج عوض فى السلم الوظيفى حتى صار (رئيس الحسابات) مع تقدم العمر وظهور بوادر (الصلعة) بدأت النقة :
- يا عوض ما تعرس
- يا عوض إنتا ناقصك شنو؟
- يا عوض البنات راقدات
- يا عوض حصل روحك
- يا عوض شفتا ليكا رئيس حسابات لسه ما عرس؟
- يا عوض جيب ليكا جنا ينفعك
وتزوج عوض نزولاً لرغبة (المجتمع) والآن لديه أربعة من الأبناء فى المراحل التعليمية المختلفة ما أن قابلته فى احدى المناسبات مؤخراً حتى بدأ يشكو لى عن صعوبة المعيشة وغلاء الأسعار وعدم كفاية (المعاش) :
- تعرف يا استاذ (الميه وعشرين جنيه) بتاعت المعاش دى ما بتعمل أى حاجه .. نحنا بناكل (عيش وشوربة) أول أسبوع في الشهر .. و تاني أسبوع فى الشهر (عيش وطعميه) ... وتالت أسبوع فى الشهر (عيش حاف) ساااكت ... والأسبوع الأخير من الشهر (بنعديهو صيام ) ... ده غير مصاريف الأولاد .. والموية والجمرة والنفايات وحبوب الضغط وحبوب السكرى والشنو ما عارف !
- وين المشكلة يا عوض ؟ الناس دى هسه كووولها ما كده !
- المشكلة يا أستاذ فى الإحساس مافيش زول عندو دم عاوز يحس بالحالة البطالة دى .. المدام ما عندها حاجة غير جيب وهات وعاوزين وعاوزين ... والأولاد كل يوم طلباتهم زائده !
- طيب ياخى ما تشوف ليك أى شغل ؟
- قالو ليك ما حاولتا .. كل ما أشوف ليكا جريده إعلانية بس أفتح ليك صفحة (وظائف) وأقوم أدور ليك على أى زول عاوز ليهو (محاسب) أو إن شاء الله (سواق) أتصل ليك بى رقم الشركة مما يسمعوا ليكا صوتى يجيهم ليكا إحباط .. طبعن بيكونو عاوزين يسمعوا ليهم (صوت ناعم) وكده ... والعجب لو ما إتصلتا ومشيت ليهم بالدرب يقعدوا يعاينو ليك من فوق لى تحت فى (قرف) ومن الإستقبال يقولو ليك أكتب لينا رقم التليفون وح نتصل فيك وعمرو يوم واحد منهم كلمني مافى ولا حتي بالغلط ...
- وخلاس يعنى إستسلمتا للواقع ؟
- إستسلم شنو دى حالة الواحد يستسلم ليها ... قلت أخاطب المسئولين والعلماء ... أكيد عندهم الحل المناسب بعثت لى (ديوان المظالم) ردوا قالو ليا (زى حالتك دى ما إختصاصنا) ، بعتا لوزير الإقتصاد رد عليا وقالي ... الله معاك ... فهمت من كلامو إنو زول (متدين) شديد وإيمانو (قوى) .. بعت إيميل لرئاسة الجمهورية ما ردوا عليا قلت إحتمال يكونو مشغولين بحكاية الإستفتاء دى ، قلتا أبعت لديوان الزكاة واحد صاحبى قال ليا لو عاوزهم يدوك أعمل ليك (قناة فضائية) !
- طيب كان تخاطب جهات عالمية
- القال ليك ما خاطبتا منو بعتا إيميل للأمم المتحدة علي أساس إني إنسان وعندى حق فى الحياة الكريمة ... ردوا وقالوا بإنو جهودهم في السودان كلها موجهه حاليا لأماكن الشده وأنا ما أماكن شده !
- طيب ما فكرتا تغترب ليه؟
- القال ليك منو .. والله بعد العمر ده فكرتا ولقيت ليا عقد بتاع (راعى) قلتا برضو (ما بطال) الواحد ممكن يقعد (يرعى) بالبهائم وكمان يحسبا ليهم .. لكن
- لكن شنو؟
- الفيزاء بى قالوا بى ستة ألف ريال وطبعن أنا كان عندى خمسة ألف قرش دى حالتى؟
- أها وهسه ناوى تعمل شنو؟
- والله قررتا أقوم أشيل الأولاد ديل ومعاهم أمهم وأسلمهم (للدولة) ومعاهم (المية وعشرين جنيه) بتاعت المعاش !!

كسرة :
حقو المسئولين عن المعاشات يصرفو للزول المعاش بتاعو ومعاهو (حاوى) !!

الغيداق

12-20-2010, 02:03 PM

[Link nur für registrierte Benutzer sichtbar] 7315_a.jpg

مما الناس قعدت تهبش فى السلم التعليمى وتغير فيهو التعليم ماضاق عافية وما قامت ليهو قائمة تانى .. يا
جماعة الخير التعليم ده زى فريق الكورة لمن يكون ماشى كويس ما بعملو فيهو تغيير.. لكن نقول لمنو
- قرأت تقريراً علمياً عن أضرار تناول الدكوة وتسببها فى مرض السرطان لذلك ومن هذا المنبر أنادى بفصل الدكوة عن السلطة .
- من علامات العبقرية التى أصبح يتمتع بها الشعب السودانى أن الطالب الجامعى بيدخل المحاضرة ما شايل ليهو لا ورقه لا قلم .. فى عبقرية أكتر من كده !
- عندما ذهبت إلى الطبيب اشكو له إرتفاع ضغط الدم كتب لى فى الروشته .. إبتعد عن سماع تصريحات المسئولين (المجغمسة) وأغانى إذاعات الإف أم وتعال قابلنى بعد عشرة يوم (عشان المراجعة المجانية بتنتهى بعد أسبوع)
- نحن شعب لا يعرف الرشوة .. لم تسجل مضابط الشرطة منذ الإستقلال حالة واحدة لا لموظف أو لمسئول تمت رشوته .. نحن شعب مصنع بمواصفات عالية الجودة !
- لو كنت مسئولاً (كبيراً) لأصدرت أمراً بعدم ظهور المسئولين فى حفلات إفتتاح أى مشروعات ... معقول وزير يسيب شغلو ومهامو ويمشى يفتتح ليهو (شفخانة) فى (أم جلافيط) مع أنو (أم جلافيط) الكهرباء ذاااتا لسه ما وصلتا ؟
- أيه المشكلة لمن ديوان الزكاة يتبرع بخمسين ألف دولار لقناة الضحى مش يمكن يكون فى مصرف إسمو (وفى القنوات) !
- التحدث بالموبايل مخالفة .. ما قلنا حاجة .. لكن الإنهماك فى مشاهدة ما تبثه (الشاشات التلفزيونية العملاقة) الختوها لينا قدام كل صينية وتقاطع دى أكبر مخالفة (يكون ناس المرور بياخدو برضو نسبة) !!
- لو قمت بتضريبه بسيطه لمنصرفات الزول (كان قعد فى سريرو وما قام) لمده شهر لوجدتها حوالى 100 جنيه بالجديد .. نفايات ... خط تلفون .. إيجار عداد كهرباء.. إستهلاك مياه .. عوائد .. بالله ده إسمو كلام ؟
- من قام بإتخاذ قرار (السبت إجازه) إضافة ليوم الجمعة أكيد غلطان .. يومين إجازه ؟ وخمسة يوم شغل؟ مفروض يكون العكس خمسة يوم إجازة ويومين شغل !
- تمتلئ الوسائط الإعلامية هذه الأيام بإعلانات عن المستوصفات الإستثمارية من شاكلة .. لقد تم بحمد الله وتوفيقه افتتاح (مستوصف تمساح الدميرة التخصصى) لجميعالأمراض وبأطباء عالميين، المستوصف تتوفر به جميع أقسام الرعايةالطبية.... قسم خاص للغسيل...غسيل كلى...غسيل مخ ..غسيل عدة.. غسيل سجّاد وموكيت ...غسيل بخار مستعجل وغسيل جيوب (طبعن) !
- بعد وضع الإشارات الضوئية مكانها تأكد لى بأن لدى الحكومة إصرار عجيب فى (حذف) الصينية من حياتنا.
- يقولون أن عهد الأنبياء قد ولى ولكن لدينا خمسة ملايين (مسئول) معصومون عن الخطأ !
- بعد أن إستمعت إلي بعض أغانيه مؤخراً بالصدفة عرفت لماذا سمى هذا (الفتاك) بالإنبراتور
- أجمل ما فى جامعاتنا أن الطالب يتخرج منها وهو يعرف القراءة والكتابة .
- لا يوجد لدينا عاطل واحد عن العمل فنصفهم قد هاجر بينما النصف الثانى قد قضى نحبه منتظراً .
- أعجب للأثرياء الذين لهم أكثر من نشاط (أدب – رياضة – صحف – شعر – تلحين) شخصياً لو كنت أمتلك مليوناً واحداً من الدولارات لما كتبت سطراً واحداً .. أكتب وللا أقعد أعد فى المال ده ؟
- هل تعلم عزيزى القارئ ان الفرق الوحيد بين عربة الإسعاف (عندنا) والعربة العادية أن الأولى يفسح لها الطريق .. لا كادر طبى لا أدوية منقذة للحياة لا أجهزة ولا يحزنون - سفاراتنا فى الخارج تحتاج إلى مراجعة (زى أى حاجة تانية عندنا) .. مات أحد أبناء الوطن فى إحدى البلدان الأوروبية وعند الإتصال بالسفاره قالت أنها تستطيع فقط أن توفر (شهادة وفاة) مجانية ! – أيه المشقة والتعب ده كلو؟

كسرة :
نما إلى علمى أن (الأخطبوط بول) الذى إستخدم للتكهن بنتائج كأس العالم الأخير قد مات .. يبدو أن أحدهم سأله التكهن عن مستقبل السودان !

الغيداق

02-03-2011, 03:14 PM

[Link nur für registrierte Benutzer sichtbar] 52_a.jpg

أجب مستعيناً بالله تعالى على جميع الأسئلة التالية مع تبيين خطوات الحل بوضوح :

السؤال الأول:

( حمدان) يعمل موظفاً يإحدى المصالح الحكومية مرتبه يبلغ 500 جنيه وهو يعول أسرة مكونة من أربعة ابناء بالإضافة إلى أمهم ويسكن في بيت إيجار في منزل صغير بحى شعبى بأطراف المدينة بأجرة شهرية تبلغ 250 جنيه . أحسب كم يتبقى من مرتب حمدان الشهري بعد خصم قيمة الإيجـــــــار

السؤال الثاني:

إذا كان حمدان يركب يوميا مواصلتين كيما يذهب لمكان عملة وكانت هاتان المواصلتان قيمة تذكرة الأولى نصف جنيه والثانية جنيهاً واحداً بحساب مجموع المبلغ الذى يدفعه حمدان للمواصلات شهريا ذهاباً وعودة ؟! مع مراعاة تقريب الناتج لأقرب عدد صحيح جبراً للخواطر.

السؤال الثالث :

كم يتبقى من راتب حمدان بعد خصم إيجار المنزل وتكلفة المواصلات الشهرية؟!

السؤال الرابع :

إذا علمت أن منزل حمدان لا يحتوى على (أي جهاز كهربائي) وعلى الرغم من ذلك فإن قيمة ما يدفعه شهريا للجمرة الخبيثه (الكهرباء) هو 50 جنيهاً كما أنه يقوم بدفع قيمة المياة الشهرية التى تبلغ 16 جنيهاً إضافة إلى رسوم النفايات الشهرية التى تبلغ 7 جنيهات فكم يتبقى من راتب (حمدان) بعد خصم قيمة الكهرباء والمياة والنفايات؟!

السؤال الخامس :
يذهب أبناء حمدان الأربعه إلى مدارسهم (كدارى) دون ترحيل غير ان كل فرد منهم يأخذ مصروفاً مقدارة جنيهاً واحداً يكفى لشراء عدد واحد (سندوتش) فول (غير مصلح) – أحسب قيمة ما يدفعه حمدان شهرياً مصروفاً لأبنائه مع الإنتباه إلى حذف أيام العطلات الأسبوعية والرسمية ثم أخصم المبلغ مما تبقى له من مرتبه .
ملحوظة :
تم إعفاء أبناء (حمدان) من (الرسوم الدراسية الإجبارية) بعد ما قام بإستخراج (شهادة فقر ومسغبة) من اللجنة الشعبية .

السؤال السادس :
يتناول حمدان وأسرته وجبة واحدة فقط فى اليوم ولحسن حظ حمدان فجميع أفراد أسرته (نباتيون) لا ياكلون اللحوم بانواعها ولا (الأجبان) ولا يشربون (الألبان) لذلك فتلك الوجبة غالبا ما تكون (فتة عدس) فإذ كانت تكلفة هذه (الفتة) كالآتى :
نصف كيلو عدس ________________ 5 جنيهات
12 (مايكروعيشة) بواقع عيشتين لكل فرد _ 3 جنيه
نصف رطل زيت ___________________ 2 جنيه
بصلتين +طماطمتين + ملح+شطة ________ واحد جنيه
كيس فحم صغير ________________ واحد جنيه
أحسب قيمة هذه الوجبة الرئيسة (فى الشهر) ثم أخصمها مما تبقى لحمدان من مرتبه (إن كان هنالك بقيه)
تنبيه :
حمدان وزوجته (عاملين رجيم) لذا فهما لا يتناولان غير هذه الوجبة فقط !

السؤال السابع :
لدى جميع أفراد أسرة حمدان ( لحسن الحظ و لسوئه في أن واحد!) مرض وراثى باللثه يمنعهم من إستعمال أي نوع من (معجون الأسنان) لذلك فهم يستخدمون (المسواك) فإذا كان كل فرد منهم يستهلك مسواكا واحدا في الأسبوع وكانت قيمة (كل 6 مساويك) تساوى واحد جنيه. أحسب إجمالى قيمة المساويك المستهلكة شهرياً ثم أخصم المبلغ مما تبقى من مرتب حمدان (إن كانت هنالك بقية)

السؤال الثامن :
لا يقوم أفراد أسرة حمدان (بكى ملابسهم) بل يكتفون بغسلها فقط ويستخدمون (صابون الغسيل) ماركة (أبو من غير رغوة) لغسيل الملابس و(الإستحمام معاً) بواقع (لوح صابون) لكل فرد أسبوعياً فإذا كان كل 6 ألواح صابون تكلف 3 جنيهات . أحسب إجمالى قيمة (الصابون) المستهلك شهرياً ثم أخصم المبلغ مما تبقى من مرتب حمدان (إن كانت هنالك بقية)

السؤال التاسع :
لا يتناول افراد اسرة حمدان (الشاى) بل يكتف كل فرد منهم بعدد 2 ملعقة سكر صغيرة فقط في اليوم (مذابه في الماء) فإذا كانت معلقة السكر الصغيرة الواحدة تحتوى على 5 جرامات من السكر أحسب كم جراماً من السكر تستهلكة أسرة حمدان شهرياً ثم أخصم القيمة الإجمالية مما تبقى من مرتب حمدان (إن كانت هنالك بقية) علماً بان سعر رطل السكر هو 2 جنيه وأن الرطل يساوى 454,5 جرام

السؤال العاشر :

هل تستطيع أن تحسب المتبقي من راتب حمدان للشهر بعد القادم بعد سداد الديون المستحقة لهذا الشهر والشهر الذى يليه إذا أمد الله في عمره علماً بأن هذا الإختبار قد خلا من أشياء أساسية كثيرة كالعلاج والدواء و(الكساء) و(المواجبات) و(الحياة نفسها) ! !

سؤال اختياري (خمس درجات إضافية) :

(أ) هل لديك أي إقتراح يقلل من منصرفات حمدان بحذف بعض البنود (البذخية) !
(ب) هل من نصيحة توجهها لحمدان (دون أن تعرض حياته للخطر) .

كسرة :
(هو فى خطر أكتر من حياتو دى ذاااتا ) !

الغيداق

02-03-2011, 03:14 PM